NDOA NI NINI?

Florence Majani Na Florence Majani NDOA! Ni neno lenye herufi nne tu, lakini tafsiri yake ni kubwa, iliyojitanua katika mawanda mapana na matawi lukuk Ndoa ni taasisi kubwa na ya kwanza, kabla ya zote iliyoanzishwa na Mungu.Katika kitabu cha Mwanzo Sura 2: 24 Biblia inasema:   “Kwa sababu hiyo mwanaume atamwacha baba yake na mama yake ataungana na mkewe na hawa wawili watakuwa mwili mmoja.” Mchungaji James Dobson kutoka England anaitafsiri ndoa kama zawadi muhimu ya kudumu wanadamu waliyopewa na Mungu. Mimi si mtaalamu wa masuala ya uhusiano, lakini yaonekana dhahiri kuwa,  ndoa  siku hizi zimepoteza maana yake. Ndoa imegeuka na kuwa si wito na kiapo kitakatifu tena, bali imegeuka na kuwa ni mtindo wa maisha. Maana nzima ya ndoa imebadilika na hapa kila mmoja anakuja na sababu yake ya kuingia katika taasisi hii. Wengi wanaingia si kwa mapenzi ya kweli, si kwa kuviishi viapo vyao, bali kwa maono yao binafsi tena ya kibinafsi. Wengine wamekuwa wakifunga ndoa ili wapate zawadi za vyombo katika sherehe za kufundwa au zile za harusi. Wengine wanakiri kabisa, kuwa, “Niliamua nimuoe kwa sababu alikwishashika mimba.” Baadhi, huoa au kuolewa kwa sababu tu, “mwenza ana kipato” hivyo anajua hatapata shida ndogo ndogo. Lakini, tujiulize hii kweli ndiyo maana ya ndoa? Mwanamke na mwanaume wanaooana, aghalabu hula viapo kuwa watakabiliana na yote yatakayowakuta katika maisha yao. Iwe ni furaha, huzuni, shida, raha, katika ugumba, iwe ni watoto wengi, katika uzee na maradhi.  Ajabu ni kuwa  viapo hivi huwa  ni vya mdomoni tu na si ajabu kusikia mwanandoa kamtelekeza mwenza wake baada tu ya kuanza kuugua au kufukuzwa kazi. Sio siri kuwa ndoa zimekuwa nyingi mno siku hizi. Kengele za harusi hugongwa kila kukicha. Lakini, ukweli ni kwamba, nyingi  zimefunikwa na migogoro …  zikitembea kwa mahadhi ya kutoaminiana, huku  mawimbi ya usaliti yakiwasonga wanandoa. Na mwishowe huvunjika. Usifikiri ni hadithi, kusikia kuwa bwana harusi alifanya mapenzi na mwanamke mwingine, siku moja kabla ya harusi yake.Si ajabu siku hizi kusikia kuwa, bibi harusi mtarajiwa, kakutwa anafanya biashara ya kuuza mwili viwanja vya Ohio. Ndiyo maana tunasema ndoa za siku hizi si wito, ni mtindo wa maisha ambao wahusika huujaribu mtindo huo, aidha waonekane nao waliupitia(wasipitwe na wakati) au wanaujaribu kama utawafaa. Wakati mwingine wanandoa huingia ndoani ili kuwaridhisha wazazi, ambao pengine wanataka mkwe kwa wakati huo. Maono ya ndoa yanaonekana kuwa yapo mbali mno na wanandoa wenyewe kama zilivyo sayari mbili za Mars na Venus. Wanachokifanya sicho kinachotakiwa ndoani. Yumkini viongozi wa dini wanashindwa kuwa wakali katika hili au kuweka msisitizo bayana kuhusu kuiheshimu ndoa. Yawezekana wazazi wameshindwa pia kutilia mkazo umuhimu wa kuithamini taasisi hii. Lakini kubwa zaidi linaloonekana ni kuwa … hofu ya Mungu haipo. Woga wa kumsaliti mume au mke umetoweka kabisa. Maana yake ni kuwa, ndoa imegeuka na kuwa si ya watu wawili, lakini yenye matawi kadhaa yasiyo rasmi. Mchungaji mmoja  aliwahi kuwaasa wanandoa fulani wapya kwa maneno muhimu mno. Aliwaambia: “Iweni wakarimu kwa watu wote na hasa kwa majirani zenu ili watu wawaombe moto au maji ya kunywa, lakini kamwe msiwe wakarimu katika vitanda vyenu vya ndoa." Ingawa takwimu rasmi hazijapatikana, lakini idadi ya mabinti waliozaa na waume za watu ni kubwa. Mabinti hawa, wamekubali kwa radhi ya mioyo yao, kuzaa na waume za watu wakidai kuwa, wataishi maisha huru, tofauti na ndoani. Swali linaloibuka hapa ni, je, kwa nini wanaume hawa wamezisaliti ndoa zao? Dini zote duniani hazikubali uzinzi huu, dini ya Kiislamu inaruhusu mke wa pili, lakini kwa kufuata sheria zote. Wapo pia wake za watu, ambao hudiriki kutembea nje ya ndoa zao. Upepo huu umewachota hata vjana wadogo ambao tunawaita ‘Kizazi Y’, Ile hofu ya binti au kijana kuwa na uhusiano na mume au mke wa mtu … haipo tena. Licha ya usaliti wa kutisha katika ndoa, lakini katika nchi  zilizoendelea, siku hizi ndoa ni za kimkataba.  Kwa mfano, wanandoa wanamuziki, Beyonce na Jay Z, wameoana kwa mkataba. Mkataba huo wa miaka miwili miwili unasema, endapo mwenza mmojawapo atamwacha mwenzake, kabla ya mkataba, basi atamlipa dola milioni kumi. Je, kuishi kwa mikataba ndiyo maana halisi ya ndoa? Mkataba huu una mapenzi ya kweli au ni  wa kimaslahi zaidi? Kama wanandoa wanaishi kimkataba, unadhani viapo wanavyokula mbele ya mchungaji, padre  au sheikh ni vya dhati ya mioyo yao? Baya zaidi ambalo limeibuka miaka ya karibuni ni ndoa za jinsia moja. Wanaharakati wanaozitetea ndoa hizi, wanavitumia vibaya vipengele muhimu kwa wanandoa na kuvihalalisha katika ndoa hizi. Lakini, vitabu vya dini vinawataja wanandoa kuwa ni ‘Adam na Hawa’ na si Asha na Rose au Juma na Yussuf. Katika taasisi hii ya watu wawili aghalabu tunatarajia matunda ambayo ni watoto yaonekane. Lakini ndoa za jinsia moja  zitaletaje matunda hayo? Usemi wa ‘ndoa ndoano’ unazidi kupata umaarufu. Hili linatafsiri hasi kwa taasisi hii, inaonyesha kabisa kuwa  imekosa mwelekeo- imelewa kama machela. Viongozi wa dini wanahitaji kufanya kazi ya ziada ili kuokoa wanandoa. Mafundisho ya kina yatolewe. Wazazi wawafunde kwa kina wanandoa wachanga, msisitizo uwekwe wakati wa uchaguzi  wa mwenzi. Lakini ... watu wamwogope kwanza Mungu. Usaliti, ukatili wa kijinsia na zinaa hutokana na kutoweka kwa hofu ya Mungu. Ndoa inabakia kuwa ni tendo takatifu, tusiigeuze na kuwa chanzo cha vifo-maradhi- uwanja wa mateso na majuto.  0715-773366