Kwa Mukhtasari:
Yaliyokubalika juzi, yalikanwa
jana, yaliyokanwa jana, yanakubalika leo. Rais Obama alipokubali ndoa za
watu wa jinsia moja alifahamu kwamba jamii ya Amerika ina raia wa kila
nui. Tunaomkashifu Obama ni wale tunaoomboleza zaidi kuliko waaliofiwa
na tunaowashwa na pilipili iliyo shambani mwa jirani.
WATANZANIAna Waafrika wengi walionyesha
kero na butwaa kufuatia tangazo kwamba Rais wa Marekani Barack Obama
ameonyesha nia kuunga mkono haki za raia wa Amerika walio na mahusiano
ya jinsia moja. Bila shaka mtazamo huo umekita mizizi kwenye imani
kwamba uhusiano wa jinsia moja ni mwiko katika muktadha wa mila ya
Kiafrika na ni dhambi katika mabano ya dini kuu ulimwenguni.
Makundi
kadhaa yalichukua jukwaa kukashifu
hatua ya Rais Obama kana kwamba hatua ya Obama ni ukoma na
ingewaangamiza kwa maradhi yasiyo na tiba. Isitoshe, ikumbukwe Rais
Obama ni kiongozi wa Amerika na sioTanzania
Katika kukabili mabadiliko katika
jamii haiwezekani kutumia itikadi na vifaa vilivyopitwa na wakati
kupambana na changamoto za sasa. Ndivyo ilivyo tunapokumbana na suala
kama ushoga lililo na utata kwenye nyoyo za watu wengi.
Iwapo
msimamo wako unachochewa na dini, ni vema kutambua kwamba utakatifu wa
tabia na mienendo sio jambo linaloweza kuendeshwa na sheria za umma hasa
katika jamii ya imani zinazotofautiana.
Yaliyokubalika
juzi, yalikanwa jana, yaliyokanwa jana, yanakubalika leo. Mawimbi ya
jamii hupanda na kushuka na ni sharti wanadamu wawe na wepesi wa
kuyakubali angaa jamii iepuke kukuru kakara za migongano. Kuna mataifa
yanayoendeleza hukumu ya kifo kwa kukatwa shingo, mengine yana hukumu
hiyo hiyo kwa kuchanjwa sindano iliyo na sumu ilhali mengine kwa kitanzi
shingoni.
Hukumu ya kifo
Kuna
mataifa mengine yameonelea kuwa hukumu ya kifo kwa mbinu yoyote ile
haileti haki kwa mhathiriwa; yaani kwa mwizi kuuawa, aliyeibiwa
hanufaiki na chochote. Badaye, labda adhabu ya kufaa ingekuwa kumnyima
tu uhuru katika jamii, kifungo cha maisha.
Suala
la mapenzi ya jinsia moja ni mojawapo ya mambo ambayo hatuwezi kuwa na
misimamamo inayokubalika kote na kwa wote. Hasa mjadawal mkuu ni ule wa
swaji, Je, ni ushoga ni tabia ambayo mhusika ameichagua, kwa raha zake?
Au Je, ushoga ni suala la kimaumbile na mhusika amelipokea na kwalo
hana uwezo kulibadili?
Uwezekano
kwamba hali hii ni hali ya kimaumbile haupendezi wapinzani wengi wa haki
za mashoga. Kwa sababu ya imani na tamaduni, mawazo ya wengi hayana
fursa kutazama suala la ushoga katika mabano ya ‘ni kawaida’
Wengi
wa wanaolaani mapenzi ya jinsia moja wanafanya hivyo kwa sababu finyu,
sababu zilio ovu kimsingi. Wanateremea na kuona raha kwamba kuna watu
wengi huko nje walio kwenye ‘dhambi’ mbaya kuliko zile zao. Kwa kutazama
wengine kwa jicho la kuwakashifu, wengi wa watu wa aina hii wanajivunia
kwamba hali zao ni kheri.
Wanaopenda
kukashifu tofauti watatafuta kila chembe cha tofauti kuzitumia
kuendesha ubaguzi wao. Na hata kama tungechukua mkondo kwamba mashoga ni
watu wasiotamanika katika jamii, ni lipi la kutenda kwa watu
tusiokubali tabia zao, ilhali tabia zao hazituumizi kwa kwa lolote?
Hawawezi kujieleza
Tusichoweza
kukataa ni kwamba kuna idadi kubwa ya raia hawa miongoni mwetu. Hata
hivyo katika mataifa ya Afrika, ukosefu wa kuwakubali umewasukuma gizani
hawawezi kujieleza au kujitambua; na kwa sababu wamezama na kufyata
ndimi, Afrika inajinadi kwa dai ‘uhusiano kati ya watu wa jinsia moja si
jambo la kiafrika’.
Hilo si kweli,
uhusiano kati ya watu wa jinsia moja umekuwepo kwa karne kadha barani
Afrika. Mahusiano hayo hata hivyo hayakuwa mno ya kingono.
Tukikubali
kwamba tunao kipengee hiki cha jamii, swali la pili ni lipi kuwatendea.
Ustaarabu sio kuangamiza wale tusiopenda tabia zao, ustaarabu ni
kuheshimu tofauti kati yetu, kuwaachia anga yao huku nasi tukipaa kwenye
anga yetu. Katika kufahamu hilo jamii itaishi kwa uanana kwani haki
itakuwa imetendwa.
Obama anafahamu
kwamba jamii ya Amerika ina raia wa kila nui. Tunaomkashifu Obama ni
wale tunaoomboleza zaidi kuliko waaliofiwa na tunaowashwa na pilipili
iliyo shambani mwa jirani.
No comments:
Post a Comment